testo normaletesto grandetesto molto grande
« daur

Regjistrazion ambientâl EMAS

  • Ce che al è EMAS
  • Parcè doprâ EMAS
  • Fasis dal percors

Ce che al è EMAS

L'EMAS (sisteme comunitari di Ecogjestion e Audit, in inglês EcoManagement and Audit Scheme) al è un sisteme public di certificazion ambientâl volontarie, viert a cualsisei organizazion publiche o privade che e vueli impegnâsi a judicâ e miorâ la proprie eficience ambientâl in tiermins di: miorament continui des prestazions, coinvolziment dai dipendents, comunicazion cu lis parts interessadis. EMAS al è ricognossût a nivel comunitari e al ubidìs al regolament (CE) 761/2001.

File Acrobat .PDF Regolament european EMAS (N.761/2001)
(file Acrobat .PDF - 159 kbyte)

Parcè doprâ EMAS

Parcè che al è un sisteme che al rint no dome trasparint e evident la proprie azion tai confronts de comunitât di riferiment,  ma le rint ancje documentabil e che si pues cjatâle fûr; e daspò al contribuìs a un gnûf mût di rapuart tra aministradôrs e citadins.
Da chest pont di viste il percors di regjistrazion Emas al corispuint ad in plen a une des liniis puartantis de politiche ambientâl de Aministrazion Comunâl di Udin, ven a stâi chê di rivâ a obietîfs che a pontin a sostignî il svilup dal teritori.

  1. Al è un sisteme par incressi la cussience ambientâl de struture e par rinfuarcî la sô capacitât di miorâ la gjestion dai aspiets de proprie ativitât che a ricjadin in vie direte o no sul ambient. Cheste sorte di metodologjie e domandarà un coordenament sistematic tra dutis lis funzions de Aministrazion.
  2. Al permet un fuart miorament tai rapuarts e te comunicazion interne tra diviers setôrs dal Ent, che prime a lavoravin isolâts e sierâts a influencis esternis.
  3. Al permet di miorâ la comunicazion esterne, che e varà di jessi in dôs direzions, ven a stâi di e viers il citadin, che al podarà vê part tes sieltis  strategjichis che a interessin la citât.
  4. Al sigure un tratament trasparint dai dâts ambientâi a disposizion, che a son controlâts di un organisim indipendent e metûts a disposizion des parts che a son interessadis.

Fasis dal percors

Par aderî a EMAS lis organizazions a àn di lâ daûr des fasis di une procedure definide che e oblee a:

  • fâ prin une analisi ambientâl, che e permet di fissâ e calcolâ i aspiets ambientâi significatîfs colegâts in vie direte e indirete cu lis propriis ativitâts che a son stadis fatis;
  • definî e fâ un document di politiche ambientâl, che al vebi dentri i obietîfs e i principis di azion che la organizazion e ponte a rivâ a fâ, no circoscrits al rispiet di limits e disposizions di leçs in vigôr, ma cun l'impegn di fâ intervents di miorament continui e concret des propriis prestazions ambientâls. La realizazion de Politiche ambientâl se met in pratiche butant jù i obietîfs specifics intun Program ambientâl. Chescj obietîfs, fissâts in coerence cui impats ambientâi plui impuartants, a àn di jessi descrits, comunicâts e inzornâts regolarmentri.
  • istituî un sisteme di gjestion ambientâl, formât di un complès di personis, risorsis e proceduris, cun chê di planificâ lis azions, metilis in pratiche, verificâ i risultâts e decidi se tignî o gambiâ lis decisions cjapadin te fase di planificazion. La eficacitât dal Sisteme, il so just funzionament e la sô idoneitât si fondin su la esate individuazion dai aspiets ambientai cu la Analisi e il mantegniment de conformitât ae normative ambientâl, par mieç di une ativitât di aciertament periodic (auditing).
  • l'ultin passaç che l'EMAS al domande, al è chel di butâ jù la Declarazion ambientâl. Cun chest document si sodisfe la esigjence di comunicâ in forme ative e cun trasparence viers l'esterni lis propriis prestazions ambientâi, come ancje la organizazion dal propri Sisteme di Gjestion Ambientâl. La Declarazion ambientâl e je il document di fonde pal control de bande di personis autorizadis e indipendentis che a fasin verifichis sul ambient. Lôr midiesims le validin se la aplicazion di EMAS e risulte secont dal Regolament. La Declarazion e à di jessi elaborade al fin di vê la prime regjistrazion; daspò, ogni trê agns si à di rivâ a vê une edizion gnove e complete, invezit i inzornaments a àn di jessi dâts an par an.

EMAS al domande ancje la partecipazion ative dai lavoradôrs: cheste e je une condizion che e ven prime di dut il rest e ancje la fonde par un miorament continui des prestazions ambientâls e a chest fin la comunicazion dentri dal ent a à di jessi garantide a ducj i nivei.

Dutis lis fasis sore descritis a sono dissiplinadis dal Regolament 761/2001 art.3, in particolâr in chest articul al ven riclamât il materiâl in zontât relatîf a ogni fase de Regjistrazion, dulà che a son detadis lis carateristichis che a coventin par vê la conformitât.

 

 

Pagina aggiornata il: 11/08/11


Link rapids: URP informe | calendari events | ricerche | mappe dal sito | icona pdf version pdf